MIAKA 11 YA ASKOFU SANGU: CHIMBUKO LA JIMBO JIPYA LA BARIADI NA MAGEUZI YA KIROHO NA KIJAMII SHINYANGA

Askofu Liberatus Sangu, kesho Jumapili tarehe 12 Aprili 2026, anamshukuru Mungu kwa kutimiza miaka 11 ya Uaskofu na utume katika Jimbo la Shinyanga.

 Alizaliwa tarehe 19 Februari 1963 katika Kijiji cha Mwanzye, Jimbo Katoliki la Sumbawanga. Alipata malezi ya kikasisi katika Seminari Kuu za Kibosho (Moshi) na Segerea (Dar es Salaam), ambako alipewa mafunzo ya falsafa na teolojia.

Alipadrishwa tarehe 3 Julai 1994 katika Jimbo la Sumbawanga na kuanza utume wake kwa kuhudumu katika nafasi mbalimbali, ikiwemo ulezi wa seminari, uparoko na uongozi wa miito. Kuanzia mwaka 1996 hadi 1999 alijiendeleza kielimu mjini Roma, Italia, na kupata Shahada ya Uzamili katika taaluma ya Sakramenti za Kanisa.

Baadaye aliteuliwa kufanya kazi Vatican kama Afisa Mwandamizi katika Idara ya Uinjilishaji wa Watu, ambako alipata uzoefu mkubwa wa utume wa Kanisa kimataifa.

Mwanzo wa Utume na Msingi wa Uongozi

Katika historia ya Kanisa Katoliki Jimbo la Shinyanga, uongozi wa Askofu Sangu umebeba sura ya mageuzi makubwa ya kiroho, kijamii na kiutawala. 

Anapotimiza miaka 11 tangu kuwekwa wakfu na kusimikwa kwake kuwa Askofu wa nne wa Jimbo hilo, mchango wake umeacha alama isiyofutika, ikiwemo kuzaliwa kwa Jimbo jipya la Bariadi.

Askofu Sangu aliteuliwa kuwa Askofu wa Jimbo la Shinyanga tarehe 2 Februari 2015 na Hayati Baba Mtakatifu Fransisko, kufuatia kifo cha mtangulizi wake Askofu Aloysius Balina kilichotokea Novemba 6, 2012.

Aliwekwa wakfu na kusimikwa rasmi Aprili 12, 2015, akitokea Vatican ambako alikuwa akihudumu katika Idara ya Uinjilishaji wa Watu.

Akiwa na kaulimbiu isemayo “Tunda la roho ni upendo”, alianza utume wake kwa dhamira ya kuimarisha imani, kuendeleza mshikamano wa waamini na kulijenga Kanisa linalojitegemea.

Kusogeza Huduma za Kiroho kwa Waamini

Moja ya misingi mikuu ya uongozi wake imekuwa ni kusogeza huduma za kiroho karibu na waamini, hasa walioko maeneo ya pembezoni.

Kupitia mkakati huu, alifanya ziara nyingi katika maeneo yaliyokuwa hayafikiki kwa urahisi kutokana na changamoto za miundombinu na umbali.

Matokeo ya juhudi hizo ni ongezeko la Parokia kutoka 26 alizozikuta hadi kufikia 40, baada ya kuanzisha Parokia mpya 14. Hatua hii imeimarisha huduma za kichungaji na kuwafikia waamini wengi zaidi, hususan katika maeneo ya vijijini.

Askofu Sangu akiwa na watu wa jamii ya wafugaji katika Parokia ya Wila Wilayani Kishapu mkoani Shinyanga ikiwa ni sehemu ya ziara yake ya kichungaji kwenye eneo hilo

Chimbuko la Jimbo Jipya la Bariadi

Katika kuendeleza dhana ya kusogeza huduma, Askofu Sangu alianzisha mchakato wa kugawanywa kwa Jimbo la Shinyanga ili kuunda Jimbo jipya la Bariadi. Hatua hiyo ililenga kuwapa waamini huduma za karibu zaidi na uongozi unaowafikia kwa urahisi.

Hatimaye, tarehe 19 Machi 2026, Jimbo la Bariadi lilizinduliwa rasmi, na kumpata Askofu wake wa kwanza Mhashamu Prosper Baltazar Lyimo, likiwa ni moja ya mafanikio makubwa ya kihistoria katika kipindi cha uongozi wa Askofu Sangu.

Ikumbukwe kwamba, baada ya Jimbo la Shinyanga kuzaa Jimbo jipya la Bariadi kwa sasa limebaki na Parokia 24 na Parokia teule tatu za Masanwa, Mwakitolyo na Lyamidati ambazo zimewekewa Mapadri wa kuzihudumia.

Askofu  Sangu akiwaaga waamini wa Jimbo jipya la Bariadi mara baada ya Misa ya kusimikwa kwa Askofu wa kwanza wa Jimbo hilo Mhashamu Prosper Baltzar Lyimo

Kuimarisha Miito na Rasilimali Watu

Katika kuhakikisha huduma za Kanisa zinaendelea, Askofu Sangu alitoa msukumo mkubwa kwa vijana kuitikia wito wa upadre na utawa. Idadi ya waseminari iliongezeka kwa kiasi kikubwa kutoka chini ya 10 hadi zaidi ya 70, huku wengi wao tayari wakiwa Mapadre wanaohudumu ndani na nje ya Jimbo ikiwemo Jimbo jipya la Bariadi na wengine wakiendelea na masomo ya majiundo ya kipadri kwenye Seminari mbalimbali nchini.

Askofu Sangu akiwa kwenye picha ya pamoja na waliokuwa Mashemasi 11(kwa sasa ni Mapadri) mara baada ya Ibada ya Masifu ya jioni ambayo ilikuwa sehemu ya maandalizi ya kuwapa Daraja la Upadri

Aidha, amewezesha Mapadri zaidi ya 20 kujiendeleza kielimu ndani na nje ya nchi, hatua iliyoongeza ubora wa huduma za kichungaji na kitaaluma.

Kuendeleza Elimu na Afya

Akitekeleza dhana ya kumhudumia binadamu mzima—mwili na roho—Askofu Sangu amewekeza katika sekta za elimu na afya. Ameanzisha na kuimarisha shule za msingi na sekondari, huku akisisitiza kila Parokia kuwa na eneo la elimu, hasa kwa watoto wadogo.

Kwa upande wa afya, ameendeleza huduma kupitia zahanati, vituo vya afya na hospitali, akishirikiana na wadau mbalimbali ili kuboresha huduma hizo kwa jamii bila ubaguzi.

Kituo cha Afya Ngokolo ambacho kimefanyiwa maboresho kwa kushirikiana na Shirika la Madaktari na Afrika (CUAMM)

Mafanikio ya Seminari na Malezi ya Vijana

Seminari Ndogo ya Shanwa iliyopo Maswa imepata mafanikio makubwa chini ya uongozi wake, ikiboreshwa miundombinu na ubora wa ufundishaji. Kwa sasa, seminari hiyo licha ya kupokea wanafunzi kutoka Jimbo la Shinyanga, pia inapokea wanafunzi kutoka majimbo mbalimbali ikiwemo Jimbo kuu la Mwanza, Jimbo la Geita, Jimbo la Musoma, Jimbo la Bunda na Jimbo jipya la Bariadi na imekuwa miongoni mwa shule zinazofanya vizuri kitaaluma katika Mkoa wa Simiyu.

Vilevile, ameimarisha malezi ya vijana kupitia vyama vya kitume, akilenga kuwajenga kiimani, kimaadili na kijamii.

Huduma za Kijamii na Mawasiliano

Katika upande wa huduma za kijamii, Askofu Sangu alifufua na kuimarisha shirika la CARITAS, linalowasaidia watu wenye uhitaji kwa kuwawezesha kiuchumi na kijamii.

Aidha, amewekeza katika kuboresha miundombinu ya Redio Faraja ili iwe chombo madhubuti cha kuelimisha, kuhabarisha na kuunganisha jamii. Redio hiyo pia imekuwa jukwaa la kukuza mshikamano wa kidini kwa kutoa nafasi kwa madhehebu mbalimbali

Askofu Sangu akiwa kwenye Kikao na Kamati ya Mawasiliano Jimbo kujadili na kuweka mikakati ya maendeleo ya Redio Faraja

Kukuza Umoja, Amani na Maadili

Katika mafundisho yake, Askofu Sangu amesisitiza umuhimu wa amani, upendo na mshikamano, huku akipinga vikali vitendo vya ubinafsi, ukatili dhidi ya wanawake na watoto, pamoja na migawanyiko ya kijamii.Ameendelea kuwa sauti ya maadili mema, akihimiza jamii kuishi kwa kuzingatia utu, haki na mshikamano.

Askofu Sangu alipotembelewa kwenye makazi yake mjini Shinyanga na Waziri wa Maendeleo ya Jamii, jinsia, wanawake na makundi maalum Mh.Doroth Gwajima ikiwa ni hatua ya Serikali kutambua mchango wake katika vita dhidi ya ukatili kwa wanawake na watoto

Hitimisho

Miaka 11 ya uongozi wa Askofu Liberatus Sangu imeleta mageuzi makubwa ndani ya Jimbo la Shinyanga. Kuanzia kuimarisha imani ya waamini, kuongeza miundombinu ya Kanisa, kukuza rasilimali watu hadi kuanzishwa kwa Jimbo jipya la Bariadi—yote haya yanadhihirisha uongozi wenye dira na matokeo chanya.

Hayo yote amekuwa akiyataja kuwa yamewezekana kwa uwezo na nguvu za Mwenyezi Mungu, na anayepaswa kupewa sifa na utukufu ni Mungu mwenyewe